Балалар Кыш Бабайдан нәрсә сорап язалар?
RT телеканалы сайтында быел балаларның Кыш Бабайга теләкләре турында күзәтү урнаштырылган.
Күпчелек балалар Кыш Бабайдан якыннары өчен сәламәтлек һәм бәхет сорыйлар, диелә хәбәрдә.
Балалар тагын смартфоннар, курчаклар һәм машиналар сорый.
Владимир өлкәсеннән тугыз яшьлек Лиза илдәге елгаларга суны кайтаруларын сораган, чөнки аны елгалар кибү мәсьәләләре борчый икән.
2019 елның 1 ноябренә Великий Устюгтагы Кыш бабайга 3,6 миллион кешедән дә хатлар килгән, алар арасында 40 яшьтән узган кешеләр язган хатлар да бар. Канцеляриядә хатларны иҗади тупланма һәм күңел тупланмасы итеп җыеп баралар икән.
Кыш Бабайга хатны "миңа кирәк" яки "миңа бүләк ит" дип башларга киңәш итмиләр. Башта Кыш Бабай белән исәнләшергә, аннары үзең турында сөйләргә кирәк һәм шуннан соң күңел түрендәге иң көчле теләкләрне язарга кирәк, дип киңәш ителә. Хат ахырында саубуллашырга һәм датаны куярга кирәк. Хатка шигырь яисә рәсем дә беркетергә була.