В заголовках  В тексте
Җомга, 30 Декабрь 2016 15:14

«İrtänge biştä 9 aylıq balasın aşatqan da, kinät wafat bulğan»

Yaña yılğa biş kön qalğaç, Baltaç rayonı İske Salawıç awılında yäşäwçe Sämiğullinnar häm Arça rayonı Qısna awılında yäşäwçe Ğärifcanovlar qapqasın qara qayğı şaqıy. Sämiğullinnar – ğäziz qızların, Ğärifcanovlar kilennären yuğalta.


Firdiägä 2 dekaber könne nibarı 25 yäş tulğan bula. İrtänge biştä tuğız aylıq balasın aşatqannan soñ, yoqığa tala yäş ana. Şul yatudan başqa tormıy. Bügen (30 dekaber) tuğan nigezendä anıñ öçesen uqıtalar.

İlnur belän Firdiä dürt yıl oçraşıp yörep, 2015 yılnıñ 5 oktäberendä qawışa. Bäxetlären tulılandırıp, tuğız ay elek cir yözenä näni qızçıq – Rizälä awaz sala. Şuşı bäxet töyençegeneñ här qılanmışına quanıp yäşägän mizgeldä, İlnur kinät tol qala. Ä Rizälä äle berni dä añlamıy. Ul bişegendä härkemgä yılmaya, kölä. Änisez üsüneñ ni ikänen toymıy şul äle sabıy.



– Qızım bik aktiv ide, – dip süz başladı änise Firdaniä xanım küz yäşläre aşa. – Biergä yarattı. Mäktäptä ber genä bäyrämdä dä biemi qalmıy ide. Arça pedagogiä kölliätendä belem aldı. Anı tämamlağaç, çittän torıp QFUnıñ çit tellär fakul'tetına uqırğa kerde. Ğinwar ayında diplom alırğa barası ide. Şunıñ turında küpme xıyallandı, alırğa ölgermi qaldı sabıyım...

Firdaniä xanım ğailäsenä şundıy zur awırlıq kiläsen yalğış qına da sizenmi. Ber atna elek äti-äni yanında dürt kön qunaq bulıp kitä Firdiä. Tuğan nigezen balaçaqtağı kebek Yaña yılğa kienderä, çırşı bizi. Kitkändä dä: «Yaña yılğa kiläbez», – dip sawbullaşa.

– Qızım kilgäç, minem quldan eş töşä ide. Min eştän qaytqançı (Baltaçta söt-may kombinatında xezmät quya) Firdiä aşarğa peşerep quya. Bu yulı kön sayın ni dä bulsa peşerdem. Berençe könne mantıy yasadıq. Balam söyenä-söyenä: «Äni, ikäw yasağaç, tiz dä buldı, tämle dä», – dip quanıp aşadı. Qalğan könnärdä dä qıstıbıy, qoymaqlar belän sıyladım. Güyä, bu bit minem balamnı soñğı aşatuım dip sizengänmen, – dip yäş qoya Firdaniä apa.

İrtägä üläse digän kiçne dä telefon aşa aralaşa äni belän qız.

- Kiçke tuğız tulğanda söyläştek. Rizäläneñ yaña hönärlären sanadı. Tınıç yoqılar teläp sawbullaştıq. Şunnan soñ da äle ul, 12 nçe yartığa qädär internetta utırğan.

Yäş äni irtänge bişençe yartıda balasın – küz nurın aşata da, qarawatına sala. Yoqınıñ iñ tämle çağı, üze dä yaratqan ire yanına sıyına. Ozaq ta ütmi, Firdiä xırlıy başlıy. İlnur aña: «Borılıp yat äle, ğırlıysıñ», – dip endäşä. Tik xatını anı işetmi. Bu yäş ananıñ dönyadan ayırılıp, can birep yatqan mäle bula. Şunnan soñ ul qaltırana başlıy. İre anı idängä yatqırıp, yasalma sulış yasap qarıy, tik soñ bula inde.

- İrtänge 6 tulğançı kilde bu xäbär. İrtän yäki tönlä waqıtlı-waqıtsız telefon şaltırasa, yörägem alına. Aldım trubqanı. Kiäw: «Äbi, Firdiä awırıy», – dide. Çığıp çaptıq. Ülär digän uy başqa da kermi. İşeğaldında qoda qarşı aldı. Anıñ: «Bik awır xällär, qodaği» digän süzennän barısın da añladım, – di Firdaniä apa.

İlnur aşığıç yärdäm çaqırta. Feldşer isä Firdiäneñ cansız gäwdäsen Arça xastaxanäsenä alıp barırğa quşa. Çönki kinät ülgän yäş keşene yarmıyça kümärgä röxsät itelmi. Tik Arçada sud-meditsina ekspertizası ütkärüçe belgeç yuq ikän. Döres, ştatta patoloğanatom bar. Ämma ul awırmıyça, kinät ülgän yäş keşene yara almıy. Nişlärgä? Patoloğanatom söyekle xatının yuğaltqan irne tikşerü komitetına cibärä. Alar isä ekspertiza yasatu öçen Baltaçqa yullıy. Ämma Baltaç belgeçläre xatınnıñ ülem säbäben açıqlaw öçen mäyetne respublika ekspertiza bürosına alıp barırğa kiñäş itä. Ğäcizlektäp aptırağan ir Arçanıñ tikşerü komitetına barıp tağın yullama ala: mäyetne Qazanğa alıp baru öçen.

- İrtädän kiçkä qädär yulda buldı qızımnıñ cansız gäwdäse. Ülgäç tä tınıçlıq bulmadı meskengä, – dip uftana Firdaniä apa.

Tuğız aylıq Rizäläne İlnurnıñ äti-änise tärbiäli. Kilen belän qayınanıñ mönäsäbätläre bik matur bula.

- Änile-qızlı kebek yäşädelär alar, – di Firdaniä apa. – Kürşe-külännäre dä bik yuqsınıp yılıy, alar belän dä urtaq telne tiz tapqan qızım. Kiäw belän dä araları äybät ide. Ber-bersenä isem belän dä endäşmilär, «cimeş» dip kenä toralar ide.

Äni nazınıñ ni ikänen dä tatırğa ölgermägän bäläkäç tä, söyekle xatını belän ber genä yıl yäşäp qalğan İlnur da, ğäziz balaların yuğaltqan äti-äni dä qızğanıç.



Narasıy dürt aydan soñ uq kükräkne taşlağan. Bügen bar närsäne teläp aşıy di. Güyä, Firdiä balasınıñ yätim qalasın sizgän dä, aşarğa öyrätep qaldırğan.

Waqıtsız wafat bulğan xatınnıñ analizların Mäskäwgä cibärgännär. Bügenge köngä quyılğan diagnoz isä: Firdiäneñ yöräge kinät tuqtağan.

- Berqayçan da yöräge awırtqanı bulmadı, – di Firdaniä apa. –Küptän tügel genä operatsiä kiçergän idem. Minem öçen ut yottı. «Äni, awır kütärmä, üzeñne saqla», – dip borçıldı balaqayım. Üzeneñ awıruın da belmiçä, yäşäp tä qalmıyça taşlap kitte...

Firdiäneñ yaqınnarınıñ açı xäsräten urtaqlaşabız. Xoday Täğälä kürkäm sabırlıqlar birsen!


Çulpan ŞAKİROVA

Yazmanı bäyalägez
(0 tavışlar)
Soñgı üzgärtü Җомга, 30 Декабрь 2016 16:52
Fiker kaldırırga

Kiräkle mäglümat (*) kertügezgä inanıgız (
HTML-kodlar tıelgan)


Älege kategoriyadäge başka yazmalar: 2017 yılğa yoldıznamä

Татар-информ яңалыклар

  • БАРЛЫК ХӘБӘРЛӘР
  • ТАТАРСТАН
  • РОССИЯ

Latin imlasına küçerüçe programma avtorı – N.Timerğäliev