В заголовках  В тексте
Чәршәмбе, 11 Гыйнвар 2017 10:09

Bäyräm yallarına näticä: närsä, qayda, küpme?

Bäyräm yallarına näticä: närsä, qayda, küpme? Ramil ĞÄLİ fotoları

Xalıq, nihäyät, çın-çınlap yal itärgä öyrände, di Tatarstan Prezidentı yärdämçese Läylä Fazlıyıva. Aktiv küñel açu çaralarına östenlek birüçelär artuın Yaña yıl bäyrämnäre açıq kürsätte: parklar, şuğalaqlar, çañğı trassalarınnan xalıq ber özelmäde. Qaya barsañ, şunda şığrım tulı keşe. Şunısı söyeneçle: isertkeç eçemleklär eçep käyef-safa qoruçılar yıldan-yıl kimi bara, ä ğailä belän yal itü modağa kerep kitte.


Yaña yılnıñ ozın-ozaq yalları ütep tä kitte. İnde xäzer alarnı sağınıp iskä alası ğına qaldı. Şöker, bäyräm ruxın bozarlıq küñelsezleklär bulmadı. Respublikabıznıñ küñel açu çaraların oyıştıru häm uzdıru öçen cawaplı ministrlıq, vedomstvo wäkilläre dä ciñel sulap quydı. Xäzerge waqıtta alar imin, xäwef-xätärlärsez genä uzıp kitkän «kanikullar» turında xisap tota.


QAZAN BULDIRA, BAŞQALAR DA QALIŞMIY


Respublikabızda xalıqnıñ käyefen kütärü öçen zur tırışlıq quyıla bit. Bilgele, başqalabız Qazan bu isemlektä berençelekne birmi. Yözlägän küñel açu çarası, distälägän tözekländerelgän park, çırşı mäydançıqları, şuğalaqlar, çañğı yulları – räxätlänep yal itü, küñel açu öçen mömkinleklär muldan.

– Bu Yaña yılda ata-analar bik aktiv ide. Alar ozın-ozaq yallarnı balalarına mömkin qädär kübräk bağışlarğa, bergä yal itü mömkinlegennän faydalanırğa omtıldı. Bıyıl bez, ğömer bulmağança, balalarıbızğa yöz belän borıldıq, – di Läylä Fazlıyıva.

Qazan Başqarma komitetınıñ Mädäniät idäräse başlığı Azat Abzalov xäbär itkänçä, başqalabıznıñ 39 çırşı mäydançığında açıq hawada meñgä yaqın çara uzdırılğan. Kreml Yar buyı, Qazan ippodromı territoriäsendä eşli başlağan «Xan sarayı», qışqı «Yurkin park», küptän tügel genä açılğan Gor'kiy-Ämät parkı ayırım bilgeläp ütelde. Kreml Yar buyı, rekord quyıp, bıyıl 300 meñ keşene qabul itkän!




Ämma respublikabıznıñ başqa şähär-rayonnarında da kimen quymıylar – härqaysında üzlärençä icadi yaqın kilep xalıqqa bäyräm yasıylar. Aqsubay, Leninoğorsk, Minzälä, Yaña Çişmä, Bögelmä, Baltaç, Biektaw h.b. rayonnar Yaña yıl yalların qızıqlı itü öçen zur tırışlıq quyğan.


TEATR-MUZEYLARDA İÑ «QIZU» ÇOR


Bäyräm yalları waqıtında töp yök mädäniät uçrejdenieläre «cilkäse»nä töşte. Tatarstan mädäniät ministrınıñ berençe urınbasarı Elwira Qamalova xäbär itkänçä, Yaña yıl çaralarında barlığı 72 meñ keşe qatnaşqan.

- Yaña yıl çaraları dekaber urtasında uq başlanıp kitte. Barlığı 450 çara ütkärelde, şunıñ 380yı – balalar auditoriäse öçen. Alarda 72 keşe qatnaştı. Muzey, muzey-tıyulıqlar da bik qızıqlı programmalar äzerlägän ide. Alar 12 meñ keşene qabul itte, – dip belderde ul.


TURİSTLARDAN UÑDIQ


Ğädättägeçä, Tatarstan xalqı häm çittän kilgän qunaqlarnı iñ küp cälep itüçe obyektlar arasında Zöyä utraw-şähärçege, Bolğar muzey-tıyulığı, Milli muzey, «Qazan Kremle» muzey-tıyulığı, Alabuğa muzeyen atap kitärgä bula. Tuqay muzey kompleksı häm Qış Babay rezidentsiäse dä turistlarğa qıtlıq kiçermägän.

Qazan Yaña yıl bäyrämnärenä cälep itelgän turistlar sanı buyınça barı tik Mäskäw häm Sankt-Peterburğatan ğına qalışqan. Yaroslavl' häm Soçinı da uzdırğanbız xätta. İñ berençe çiratta, başqalabız bäyälär belän aldırğan. Ber kön yäşäw häm tuqlanu turistlar öçen urtaça 3-3,5 meñ sumğa töşkän. Ğomumän alğanda isä, uzğan yıl bäyräm yalları belän çağıştırğanda, bıyıl Qazanda turistlar sanı 2-3 protsentqa artıp, 133 meñgä citkän.

 


BER MİÇKÄ BALĞA – BER QAŞIQ DEGET


Yaña yıl kanikulları waqıtında wäzğiät şaqtıy imin bulğan, ğädättän tış xällärgä yul quyılmağan disäk tä, ayırım küñelsezleklär bulmıy qalmağan. Yanğın küzätçelege buyınça respublikanıñ baş inspektorı Sergey Sergeyev xäbär itkänçä, 31 dekaber–9 ğinwar könnärendä respublikabızda 81 yanğın çıqqan. Bu, uzğan yılnıñ şul çorı belän çağıştırğanda, 23 protsentqa kimräk. Alarda 5 keşeneñ ğömere özelgän. Yanğınnarnıñ 78 protsentı toraq sektorına turı kilä.

Pirotexnik eşlänmälär qullanu çiklänsä dä, qanunğa buysınmawçılar da bulğan. 1688 reyd waqıtında tieşsez urında pirotexnika qullanunıñ 1274 oçrağına yul quyılmağan, 103 keşe administrativ cawaplılıqqa tartılğan. Pirotexnik eşlänmälärdän ike keşe zıyan kürgän.


Güzäl NASIYBULLİNA

Yazmanı bäyalägez
(0 tavışlar)
Ukılgan 23 märtäbä Soñgı üzgärtü Чәршәмбе, 11 Гыйнвар 2017 10:40
Fiker kaldırırga

Kiräkle mäglümat (*) kertügezgä inanıgız (
HTML-kodlar tıelgan)


Татар-информ яңалыклар

  • БАРЛЫК ХӘБӘРЛӘР
  • ТАТАРСТАН
  • РОССИЯ

Latin imlasına küçerüçe programma avtorı – N.Timerğäliev