В заголовках  В тексте
Чәршәмбе, 11 Гыйнвар 2017 19:47

«Dustanä sırxawxanä»: uñaylı moxit, itağätle tabiblar, tämle tel

«Dustanä sırxawxanä»: uñaylı moxit, itağätle tabiblar, tämle tel Ramil ĞÄLİ fotoları

Nihäyät, moña qädär sırxawxanälärdä küzätelgän tabiblar tarafınnan tupas möğämälä, ozın çiratlar, tabibqa yazılıp bulmaw, qabul itügä az waqıt sarıf itelü häm başqa şiqäyätlärgä noqta quyar waqıt citte kebek. Respublikada «Dustanä sırxawxanä – Tatarstan standartı» proyektı ğämälgä aşırıla başladı.


Süz dä yuq, tabiblarnıñ patsientlarğa qarata dorfa qaraş probleması moña qädär Tatarstan Sälämätlek saqlaw ministrlığınıñ kollegiä utırışlarında daimi kütärelep kilde. Tatarstan citäkçelegeneñ dä moña şeltä beldergäne bar, Prezident Röstäm Miñnexanov isä sälämätlek saqlaw ölkäsendä berençel zveno üseşenä ireşü burıçın quyğan ide. Proyekt ta, nigezdä, näq menä şuña yöz tota.


İñ möhime – uñaylı moxit


- İsänmesez, äydägez, baxillar alığız da, ayaqlarığızğa kiep, ğarderobqa räxim itegez! – Qazannıñ 18 nçe şähär sırxawxanäsendä patsientlarnı işek töbendä maxsus personal şundıy süzlär belän qarşı ala. Annan soñ alar qaya barırğa kiräklekne añlata, yağni, patsientnıñ marşrutın tözergä yärdäm itä. Östäwenä, monda navigatsiä sisteması da bar: patsient, sırxawxanägä kergäç, qaya möräcäğät itäsen, qaysı kabinetqa keräsen – barısın da kürä. Terminal qırıylarında torğan şäfqät tutaşları da teläsä nindi sorawğa cawap birergä äzer.

 


Proyekt uzğan yılnıñ iyülendä ğämälgä aşırıla başlağan. Aña 5 mln sumnan artıq aqça bülep birelgänen, 4 mln sumı – tözeleş eşlärenä, 1 mln sumnan artığı cihaz, texnika satıp aluğa yünälderelgän. Remont yasalğan berençe qatta patsient küñelenä xuş kilerlek moxit buldırılğan. Biredä kötep utıruçılar öçen WI-FI zonası bar, quler belän su, qänäfi, televizor quyılğan. Älegä proyekt Qazannan tış, Çallı, Älmät, Yäşel Üzändä dä sınala.



«Bu proyektta iñ möhime – xalıq öçen uñaylı moxit. Keşelärneñ sälämätlegen daimi räweştä tikşerü öçen, bez uçrejdeniene dustanä häm ütemle itärgä tieş. Moñarçı qomaçawlağan qarşılıqlarnı alıp taşlap, xalıqqa yaqınayıbız. Bezneñ eşne patsient bäyäli. Ägär patsient qänäğät ikän, dimäk, bez döres yünäleştä eşlibez», – di Tatarstannıñ sälämätlek saqlaw ministrı Ğädel Wafin.




«Dustanä» sırxawxanä proyektınıñ yañalıq-üzençälekläre:


1. Registratura töşençäsenä almaşqa mäğlümat stoyqası kilüe. Patsient täräzäle tügel, ä açıq zonada üzen qızıqsındırğan sorawın birä ala. «Qızğanıç, moña qädär registratura täräzäse qarşında keşe öyelep tora ide. Karta ezlägänne, annarı tabibqa çiratnı kötü käyefne boza ide. Ä bügen 70 meñ keşe terkälgän bu zur sırxawxanädä dä keşe öyelep torunı kürmibez», ˜– dip qazanışları belän urtaqlaşa Ğädel Wafin.

2. Tabibnıñ patsient belän aralaşu waqıtı 15 minutqa qädär ozaytılğan. «Bez härwaqıt tabib patsientqa waqıtnı az bülep birä dip äytä kildek. 12 minuttan 3 minutqa ğına arttırılsa da, bu – barıber möhim. Elektron yazılu mäs'äläsendä däğwalar küp ide. Kiläçäktä tabibqa kerer öçen kötep toru waqıtın 10 minuttan artmaslıq itärgä tieşbez. Bu – bezneñ burıç. Kiçektergesez oçraqta yazılmıyça kilgän keşe dejur tabibqa kerä. Mondıy ike kabinet bar», - dide ministr. Sırxawxanäneñ baş tabibı Rezidä Mansurova da anıñ süzlären cöpli: «Elek tabibqa yazılğan patsient ta, yazılmağanı da kilä ide. Näticädä, işek töbendä konflikt tua. Şuña kürä eşne bolay köylädek: aldan yazılğan patsient – uçastok tabibına, xäle naçarayıp yazılmıyça kilgän keşe dejur tabibqa kerä».

3. Tabib wazifalarınıñ ber öleşen şäfqät tutaşları üti. Alar öçen üzenä kürä «meditsina postı» buldırılğan. «Elek tabib qabul itü waqıtınıñ 20 protsentın analizlar birü-yazılu kebek ikençel plandağı sorawlarğa sarıf itsä, xäzer bu problema xäl itelgän. Patsient uçastok tabibına möräcäğät itä, ul kiñäşlären birep, meditsina postına cibärä. Meditsina postında eşläwçelär UZİ, analizlar birü waqıtın bilgeli. Elek UZİğa yazdırırğa kiräk bulğanda, uñaylı waqıtnı kileşterü öçen dä tabibta küpme waqıt sarıf itelä ide. Ä xäzer bu sorawlar meditsina postında xäl itelä. Alarnı berkem aşıqtırmıy», – dip añlata Rezidä Mansurova.

4. Tabib patsientnı berüze qabul itä, yağni awırunıñ üz probleması turında tabib belän küzgä-küz qalıp söyläw mömkinlege bar. «Şul räweşle, awıru çitensenmi, anıñ tabib aldında kübräk açılıp kitep söyläw mömkinlege bar. Bu – bik möhim, dimäk, ışanıçı da arta», – di ministr. Rezidä Mansurova da uçastok tabiblarınıñ üzläre genä qabul itüe xalıq tarafınnan uñay bäyälängänen äytte. «Elek şäfqät tutaşı yanına parallel töstä tağın ber patsient kerä ala ide. Ä bit tabib sere digän töşençä dä bar bit», – di baş tabib.

5. Patsientlarnıñ öylärenä barıp xezmät kürsätüçe feldşer briğadaları buldırılğan. Alarnıñ öydä xezmät kürsätü öçen diagnostika kompleksı belän cihazlanğan üz maşinaları bar.

6. Sırxawxanädä «Elektron qarta» proyektı tormışqa aşırıla. Barlıq yazmalar kompyüterğa, elektron meditsina qartasına kertelä. «Qartalar elekkege kebek tabib kabinetında şkafta öyelep tormıy. Bu kabinetta buş urınnı da kiñäytä», – di Qazan sälämätlek saqlaw idäräse başlığı İlnur Xälfiev.



«DUSTANÄ» SIRXAWXANÄLÄR HÄRQAYDA BULAÇAQ


Ğädel Wafin süzlärençä, kiläse yılnıñ berençe kvartalında Qazan şähäre İdel buyı rayonında konsultatsiä-diagnostika üzäge açılaq. Anda şulay uq «Dustanä sırxawxanä – Tatarstan standartı» kerteläçäk. Ministr äytüençä, bıyıl respublikanıñ başqa sırxawxanälärenä dä şuşı proyektnı kertü niätlänä. Bu nisbättän, proyekt sınaw räweşendä kertelgän 4 uçrejdeniedä kompetentsiälär üzäge bulaçaq. Alarda ekspertlar belän eşlängän metodik rekomendatsiälär nigezendä personalnı uqıtu küzdä totıla.

Äytergä kiräk, proyekt tabiblarnıñ itağätle itep söyläşüen dä küzdä tota. «Bez xalıqnı tämle tel belän yılmayıp qarşı alırğa tieş. Bu sorawlar här kiñäşmädä kütärelä, alar buyınça eşlibez», – dide ul.



Gölnar ĞÄRİFULLİNA

Yazmanı bäyalägez
(0 tavışlar)
Ukılgan 18 märtäbä Soñgı üzgärtü Чәршәмбе, 11 Гыйнвар 2017 22:51
Fiker kaldırırga

Kiräkle mäglümat (*) kertügezgä inanıgız (
HTML-kodlar tıelgan)


Татар-информ яңалыклар

  • БАРЛЫК ХӘБӘРЛӘР
  • ТАТАРСТАН
  • РОССИЯ

Latin imlasına küçerüçe programma avtorı – N.Timerğäliev