В заголовках  В тексте
Җомга, 09 Сентябрь 2016 10:20

Yärminkälär başlana (URINNAR, BÄYÄLÄR)

Yärminkälär başlana (URINNAR, BÄYÄLÄR) Soltan İSXAQOV fotoları

İrtägä, 10 sentäberdä, Qazan häm Çallıda, şulay uq Yäşel Üzän rayonınıñ Oktäberskiy bistäsendä awıl xucalığı yärminkäläre başlana. Tatarstanda yärminkä ike yaqnı da qänäğät qaldırırlıq çarağa äylängännän birle, anıñ här yaña sezonı tüzemsezlek belän kötep alına. Bıyıl da şulay. Här şimbädä yärminkä mäydançıqlarında bäyräm ruxı xökem söräçägenä şik bulırğa da mömkin tügel.


Unısı – äzer, tağın 7äw tözelä

Qazanda yärminkälärneñ alıştırğısız üz urınnarı barlıqqa kilde inde. Bu sezonda da başqala yärminkäläre 10 säwdä mäydançığında oyıştırılaçaq.

– Säwdä itär öçen Qazanda – un, Çallıda öç mäydançıq äzerlände. Monnan tış, awıl xucalığı yärminkäläre Yäşel Üzän rayonınıñ Oktäberskiy poseloğında “Yaña Tura” texnopolisı territoriäsendä oyıştırıla, – dip söyläde Tatarstan awıl xucalığı häm azıq-tölek ministrınıñ berençe urınbasarı Nikolay Titov yärminkägä äzerlek mäs'älälären qağılışlı söyläşü öçen uzdırılğan kiñäşmädä. – Krestian-fermer häm şäxsi yärdämçe xucalıqlarnıñ produktsiäsen kön sayın satu öçen Tatarstan Respublikası Prezidentı quşuı buyınça Qazanda tağın 7 säwdä mäydançığı tözelä häm tözekländerelä. Boları awıl xezmätçännärenä östämä mömkinleklär aça.

Şulay itep, säwdä mäydançıqları täğäyenlände:

– Sovet rayonında – “Qazan” agrosänäğät kompleksı” (Ağrar uram, 2) häm “Därwiş” bazarı territoriäsendä (Därwişlär bistäse, Lipatov uramı, 7);
– Yaña Sawin rayonında – “Bäxetle” säwdä üzäge mäydançığında (Xösäyen Yamaşev prospektı, 71a);
– Aviatözeleş rayonında – “Bäxetle” säwdä kompleksı qarşındağı mäydançıqta (Leningrad uramı, 27);
– Mäskäw rayonında – Ğ.Qöläxmätov häm Vosstanie uramnarı kiseleşendä (Vosstanie uramı, 83);
– Kirov rayonında – “Ciläkle bistäse” säwdä üzäge qarşındağı territoriädä (Krasnokokşayskiy uramı, 152/2) häm Yüdino bistäsendä (Yüdino bistäse, İlyiç uramı, 1);
– Waxitov rayonında – Ğruzdev uramı 5 nçe yort adresı buyınça administrativ bina qarşındağı parkovqa mäydançığında häm Kärim Tinçurin isemendäge skver qarşında (Kärim Tinçurin uramı, 13);
– İdel buyı rayonında – “Çulpan” mädäni üzäge yanındağı mäydançıqta (Ciñü prospektı, 48a).
Çallıda yärminkälär 3 mäydançıqta oyıştırıla: Sarman traqtında, Ğ.Qamal isemendäge bul'varda (Tınıçlıq häm Mäskäw prospektları arasında) häm “Yujnıy” agrosänäğät parkında.



“Tura” urınında qaldı

Bıyıl da Yäşel Üzän rayonınıñ “Yaña Tura” texnopolisı territoriäsendä yärminkäneñ qabat oyıştırıluı iğtibarğa layıq. Xäterläsägez, xalıq az yörüne säbäp itep, andağı säwdäne Qazanğa küçerü turında da süz bulğan ide. “Bez bu yärminkäneñ eşen citdi kontrol'dä totaçaqbız. Satıp aluçılar ağımın öyränü kiräk. Xalıqta biredä täqdim itelgän produktsiägä ixtıyac bulmasa, bu mäydançıqnı Qazanğa küçerergä planlaştırabız”, – dip beldergän ide ul çaqta TR awıl xucalığı häm azıq-tölek ministrı Marat Äxmätov.

Sezon däwamında yärminkägä yörüçe xalıq sanı sizelerlek artuı şikländersä dä, “Yaña Tura”dağı yärminkäneñ üz satıp aluçısı buluı bäxässez. Anda yärminkä oyıştıru täqdimen älege texnopolis wäkilläre üzläre kertkän ide, läbasa. Yärminkä yärdämendä biredä satıla torğan başqa tawarlarğa da ixtıyac uyatırğa telädelär. Yaña sezon älege mäydançıqnı çitläp uzmağan ikän, satıp aluçılar ağımı öyränelgän häm säwdägärlärne qänäğätländergän, digän süz.




Bayıp bulamı?

2015 yılda Qazanda häm Çallıda 34 awıl xucalığı yärminkäse uzdırılğan, alarğa 1,5 mlrd. sumnan artıq produktsiä kiterelgän. Monnan tış, ağımdağı yılnıñ yazında 17 yärminkä uzdırılğan.

Awıl xezmätçännäre arasında yärminkägä yış yörü näticäsendä “şoma ğına” satu itüçelärne yış oçratabız. Çerep bayıp bulmasa da, yärminkä aşa tabış aluçılar yuq tügel. Axır çiktä xökümät tä buş itmi üzlären – mömkinlektän çığıp transport çığımnarın qaplarğa tırışa, yärminkägä namus belän qarawçılarnı aqçalata da büläkli. Bu uñaydan Marat Äxmätovnıñ uzğan yıl yärminkälär sezonı başlanğan mäldä citkergän fikerläre iskä töşte.

Yärminkälär yärdämendä tabış alu, aqça eşläw maqsatı quyılmıy. Bu eşçänlek biznes tügel, ä sotsial' proyekt. Biredäge bäyä kibetlärdäge kebek ük bulsa, anıñ kiräge dä qalmas ide... Älbättä, yärminkägä satu itärgä kilüçelärne dä yaxşı añlıym. Alar moña ike kön äzerlänä. Kiçtän çığıp kitälär, töne buyı yulda. Şul räweşle, şimbä könne irtänge biştän şähär xalqına xezmät kürsätä başlıylar. Annan oyışıp qaytıp kitärgä dä kiräk bit äle. Bu – bik mäşäqätle eş. Monıñ şulay buluın respublika Prezidentı da yaxşı añlıy. Şuña kürä bezneñ här möräcäğätne tıñlap, yärdäm itärgä tırışa, – digän ide ministr.

Bäyälär arzan bulaçaq

Bäyälär bıyıl da kibetnekenä qarağanda küpkä arzanraq bulaçaq. Ministrlıq uzdırğan kiñäşmädä yärminkälärdä satıla torğan produktsiägä bäyälär bilgelände.

qoş ite – 115 sum,
kürkä ite – 235 sum,
sıyır ite – 250-300 sum,
duñğız ite – 230-270 sum,
sarıq ite – 320-380 sum,
yuğarı kategoriäle yomırqa – 55 sum,
saylanma yomırqa – 50 sum,
1 nçe kategoriäle yomırqa – 45 sum,
ülçäp satıla torğan söt – 28-30 sum,
qatı sırlar – 280-330 sum,
aq ay – 300 sum,
şikär qomı – 44 sum,
yuğarı sortlı on – 20 sum,
qaraboday yarması – 49 sum,
bäräñge – 10 sum,
kişer – 12-15 sum,
çögender – 12-15 sum,
baş suğan – 17-18 sum,
käbestä – 8-10 sum,
boday – 9 sum,
arpa – 8 sum,
arış – 6 sum,
balıq (qarp) – 150 sum.

Älege bäyälär ber kilogramm yäisä ber litr produktsiägä, yomırqağa – 10 danä isäbennän kürsätelde.


 


Sıyfat şikländermi

Yärminkä kiştälärendäge tawarnıñ sıyfatı şik uyatırğa tieş tügel. Awıl xucalığı yärminkälären uzdırğanda produktsiäne satuğa qarata quyıla torğan veterinariä-sanitariä taläpläre iğtibar üzägendä bulaçaq. İt häm başqa it produktsiäläre yärminkägä rayonnarda veterinariä-sanitariä ekspertizası uzğaç qına (ä ul tüläwsez yasala) kertelsä, eşkärtelmägän söt yoğışlı awırular bulmağan xucalıqlardan ğına kitereläçäk ikän.

– Şulay da säwdä urınında eşkärtelmägän sötne qullanu aldınnan qaynatırğa kiräklege turında yazılğan belderülär elengän bulırğa, söt kranlı termos-sawıtlarda kiterelergä häm şunnan ğına satılırğa tieş, – dip añlattı Tatarstan Respublikası Ministrlar kabinetınıñ Baş veterinariä idäräse başlığı Almaz Xisametdinov. – Yärminkägä it maxsus elgeçlärgä elengän xalättä kiterelergä tieş. Ä it taşıy torğan transportnıñ arbası sanitariä eşkärtelü uzğan buluı şart.

Şunısın da istän çığarmıyq: Qazannıñ här mäydançığında veterinariä xezmäte wäkile älege taläplärneñ ütäleşen tikşerep toraçaq.


Färit SALİXOV

Yazmanı bäyalägez
(0 tavışlar)
Ukılgan 359 märtäbä Soñgı üzgärtü Җомга, 09 Сентябрь 2016 10:57
Fiker kaldırırga

Kiräkle mäglümat (*) kertügezgä inanıgız (
HTML-kodlar tıelgan)


Татар-информ яңалыклар

  • БАРЛЫК ХӘБӘРЛӘР
  • ТАТАРСТАН
  • РОССИЯ

Latin imlasına küçerüçe programma avtorı – N.Timerğäliev