Айрат Гыйлаев: «Көрәшченең дә елыйсы килгән чаклары була»

16 Февраля 2017

Укылган: 356 тапкыр

Автор: Фәрит Салихов
Аның исеме көрәш тарихына алтын хәрефләр белән язарлык. Айрат Гыйлаев – көрәш буенча республика һәм Россиянең күп тапкырлар чемпионы, атказанган спорт остасы, билбау көрәше буенча дөнья чемпионы, грек-рим көрәше буенча спорт остасы. Күп Сабан туйлары батыры, каһарман шагыйрь Муса Җәлил истәлегенә «Ватаным Татарстан» республика газетасы тарафыннан гамәлгә куелган татарча көрәш турнирында иң күп тапкыр җиңү яулаган көрәшчесе дә ул.

КӨРӘШ ҺӘМ БӘХӘСЛӘР ТУРЫНДА

10-11 февральдә Зәй шәһәренең «Яшьлек» боз сараенда каһарман шагыйрь Муса Җәлил истәлегенә «Ватаным Татарстан» республика газетасы тарафыннан гамәлгә куелган татарча көрәш буенча традицион турнир узды. Ике көн дәвамында көрәш ярышларын күзәтүчеләр арасында Айрат Гыйлаев та бар иде.

Чалллының легендар көрәшчесе белән келәм читендә очрашып, хәл-әхвәл белешкән вакытыбыз хөкемдарлык эшенең бәхәс кузгаткан чагына туры килде.

– Хөкемдарлык вакытында төрле хәлләр була инде ул, – дип фикерләре белән уртаклашты Айрат Гыйлаев. – Без көрәшкән дәвердә дә бәхәсләр булды, алга таба да булачак. Ләкин аңа каршы көрәшергә кирәк. Хөкемдарның ялгышуы бер хәл, әмма көрәшчене “кысып” төшереп калдыру дигән әйбер дә бар бит әле. Шуның аркасында үземнең дә елыйсы килгән чаклар булгалады. Сүз дә юк, хөкемдарга андый мөмкинлек бирмәскә тырыштык. Әмма моның өчен көндәшеңә караганда бер башка өстен булырга кирәк бит. Анысы һәрвакыт барып чыкмый.

РЕКОРДЛАР ТУРЫНДА

Айрат Гыйлаевның рекордлары турында да сораштым: көрәш китапларында аның Татарстан чемпионатында – 9, Россия чемпионатында – 8, ә Муса Җәлил истәлегенә уздырыла торган турнирда 12 мәртәбә уңышка ирешүе хакында әйтелә. Моннан тыш Сабан туйларындагы уңышларының төгәл генә санын да белүче юктыр.

– Җиңүләрем хакында сорагач, санын әйтә алмыйча югалып калган чакларым да бар, – ди көрәшче. – Муса Җәлил турнирында исәпләүләрем буенча, ялгышмасам, 12 түгел, ә 13 мәртәбә җиңү яуладым кебек. Мактануым түгел, төгәллек кенә кертүем. Яшьләр мине уздыра икән, сөенәчәкмен генә. Һәр кешенең үз көрәш юлы. Дөнья чемпионатына тиң турнирда җиңүче булу зур дәрәҗә ул.

БИЛБАУ КӨРӘШЕНӘ КАРАШЫ

Соңгы елларда Татарстанда берничә тапкыр билбау көрәше буенча дөнья чемпионаты узды. 2015 елда дөнья батырларын Казанның “Ак Барс” көрәш сарае үзенә җыйса, узган ел азагында Чаллыда дөнья чемпионнарын ачыкладылар. Ә беренче тапкыр Татарстанда дөнья чемпионаты 2005 елда Казанда узганы хәтердә. Ул вакытта, ни гаҗәп, баш батырны да ачыкладылар – дөнья чемпионаты тәкәсе Айрат Гыйлаев җилкәсенә “менеп кунаклады”. Дистә елдан артык вакыт узгач, чемпионат батырның үз төбәгенә әйләнеп кайтты. Ул вакытта Айрат Гыйлаев әлеге спорт төренә карашын җиткергән иде.

– Мәртәбәле ярышларның Чаллыда узуына шәһәрнең һәр кешесе шат булырга тиештер, минемчә, – дип сөйләде Айрат Гыйлаев безгә. – Шәһәребездә көрәш мәктәбе һәрчак көчле булды, чемпионнарыбыз да, Аллага шөкер, күп. Чаллыда ярышларны да оештыра беләләр. Зал бизәлеше, ачылыш тантанасын гына күрегез – дөнья кунаклары алдында дәрәҗәбезне күрсәтә алдык. Ә билбау көрәшенә килгәндә, без беренче адымнарны ясаган еллардан соң ул шактый үсеш кичерсә дә, соңгы елларда артка чигенү барын да яшерергә кирәкми. Мин моны Халыкара билбау көрәше федерациясе президентының, шушы спорт төрен үстерүгә күңелен биреп эшләгән шәхес – Риф Гайнановның якты дөньядан китүе белән бәйләп аңлатыр идем. Көрәшебезне шушы дәрәҗәгә җиткергән кеше иде ул. Авыр туфрагы җиңел булсын...

...Ә менә  Муса Җәлил истәлегенә татарча көрәш буенча традицион турнирның Чаллыдан – Әлмәткә, аннары Биектау аша Зәйгә кайтуына тыныч карый батыр.

– Турнирның Чаллыда үскән еллары истә. Һәр төбәкнең көрәшкә булган игътибары аерым бер чорга туры киләдер. Бүген Зәйдә спортның үсеше өчен бар булган тырышлыгын эшкә җигүче район башлыгы бар икән, сөенергә генә кирәк. Турнирны кабул итәргә теләкләре көчле, шуңа күрә нәтиҗәсе дә яхшы. Ә Чаллының берничә ел рәттән турнирны үзендә кабул итүе шәһәрдә көрәш мәктәбе үсешенә юл салып калдырды. Бүген яшьләребез көрәшә. Шуларга карап куанабыз.

Фикерләр








Спорт

Көрәш сезоны ачыла: узган елгы вакыйгаларны онытмадыгызмы? (тест)

Ир-егетләр арасында турнирларга бай көрәш сезонының чираттагысы ачыла – 20-21 октябрь көннәрендә Казанның “Ак Барс” көрәш сараена Татарстан Республикасының Авыл хуҗалыгы һәм азык-төлек министрлыгы призына традицион 22 нче республикакүләм ярышлар уза. Шулай итеп, ике көн дәвамында авыл районнарыннан килгән иң көчле батырларның бил алышуын – көрәш тамашасын күрә алачакбыз.

Спорт

Дөнья кубогы иясе Азат Нурмөхәммәтов: Татарча көрәш үсеше өчен бер генә кеше җавап бирергә тиеш түгел

 Аның беренче тапкыр кулына сөлге алып, келәмгә тәүге адымын ясавына 20 елдан артык вакыт узып бара инде. 27 яшьлек егетнең ике дистә еллап көрәшүе гаҗәп түгел – Бразилиядә һәр кеше туп типкән, Канадада алка куган кебек, Теләчедә һәр малай-шалайның көрәшеп караганы бар. Барысы да бил алыша, әмма иләк аша сайланып, каршылыкларны җиңә белгәннәре генә Азат кебек көрәш мәйданнары яулый. Казан шәһәрендә урнашкан көрәш төрләре буенча «Ак Барс» балалар һәм яшүсмерләр спорт мәктәбе директоры, татарча көрәш һәм билбаулы көрәш буенча Россиянең спорт остасы, Көрәш буенча халыкара категорияле хөкемдар, Дөнья кубогы иясе Азат Нурмөхәммәтов "Интертат" электрон газетасы хәбәрчесе белән сөйләшергә бик теләп ризалык бирде.  

Спорт

Корбан Бердыев: “Рубин”дагы вәзгыятьне белсәм дә, мондый ук катлаулы хәлгә әзер түгел идем

26 августта “Рубин футболчылары “Казан Арена” стадионында “Тосно” командасы белән очраша. “Тосно” командасына каршы уенны уңышлы уздырган очракта, “Рубин”ның тәнәфескә китәр алдыннан турнир баскычында тагын да югары күтәрелү мөкинлеге бар.

БАШКА ЯҢАЛЫКЛАР

Intertat.ru © 2001 - 2017 Әлеге ресурста 12+, 16+, 18+ категорияләренә керүче мәгълүмат булырга мөмкин

"ТАТМЕДИА" АҖ филиалы "Татар-информ" мәгълүмат агентлыгының Intertat.ru республика электрон газетасы редакциясе".

Адрес: 420066, Казан, Декабристлар ур., 2нче йорт. Телефон: +7 (843) 222-0-999 (1304)
E-mail: info@intertat.ru

Генераль директор Садыйков Шамил Мөхәммәт улы.
Баш редактор Латыйпов Рәмис Нурмөхәммәт улы.
Шеф-редактор Исмәгыйлева Алсу Җәүдәт кызы

Гаммәви матбугат чарасын теркәү турындагы таныклык Россиянең элемтә, мәгълүмати технологияләр һәм гаммәви коммуникацияләрне күзәтчелек хезмәте тарафыннан 2012 елның 10нчы маенда бирелде. Таныклыкның номеры - ФС77-49790.
Материалларны тулысынча яки өлешчә куллану бары тик редакциядән язмача рөхсәт булганда гына мөмкин.
"Татмедиа" республика матбугат һәм массакүләм коммуникацияләр агентлыгы ярдәме белән чыгарыла