Австралиядә яшәүче Финзия Газизовадан «птичье молоко» кәнфите рецепты
Өйдә ясалган кәнфит «бик тәмле булачак» дип ышандыра хуҗабикә.
Ингредиентлар: 8 грамм агар-агар (сыйфатлы булсын), 150 мл су, 250 грамм шикәр комы, 120 грамм йомырка агы, 80 грамм глюкоза ширбәте, 100 грамм ак май, 70 грамм куертылган сөт (сгущенка).
Агар-агар белән суны уртача утка куярга. Кайнап чыгар алдыннан шикәр белән сиропны салырга һәм 110 градуска җиткерергә. Бу якынча 5-10 минут тирәсе була. Ширбәт кашыктан җеп булып сузылырга тиеш.
Йомырка агын ап-ак булганчы блендер белән күпертергә кирәк. Шуңа әкренләп ширбәт агызырга, блендер белән болгатуны дәвам итәргә. Әзер масса бераз ял итә.
Ул арада ак май белән куертылган сөтне блендер белән болгатырга кирәк. Йомшак масса барлыкка килергә тиеш.
Соңгы массаны кашык белән йомырка агы массасына кушарга, болгатуны дәвам итәргә.
Әзер масса уртача сыеклыкта була. Куе да түгел, сыек та түгел. Шуны майланган таба яки формага салырга да, 4 сәгатькә суыткычка куярга.
Аннары кәнфитләрне кисеп, шоколад глазурына манып алырга, өстен вакланган чикләвек, кокос вагы белән бизәргә.
⠀