Казанда кабат трамвайга ут капкан
Ялкын телләре чыгып торган җәмәгать транспортын шаһитлар видеога төшереп алган.
Бүген иртән Яңа Савин районында «Ак Барс Арена» стадионы каршында бишенче номерлы трамвайга ут капкан. Бу турыда «Татар-информ» хәбәр итте.
Маршрут буйлап бара торган трамвайның ток кабул итә торган җайланмасы яна башлаган. Җәмәгать транспорты Компрессорлар заводы ягыннан килә торган булган.
Янгын чыкканда салонда пассажирлар да булган. Алар барысы да чыгып өлгергән.
Әлеге вакыйганы узып баручы машиналарның видеорегистраторлары төшереп алган. Кадрларда ялкын телләре күренә.
Башлангыч мәгълүматлар буенча, зыян күрүче кешеләр юк. Трамвайлар хәрәкәте туктап торган.
Былтыр апрель аенда Казанда трамвай яна башлагач, пассажирлар тәрәзәдән чыгып котылган, дип язган идек.