«Кинәт аңын югалтты»: Тугызынчы сыйныфта укучы малай инглиз теле дәресеннән соң үлгән
Баланың анасы да бу мәктәптә эшләгән.
Пензадагы бер лицейның тугызынчы сыйныфында укучы малай инглиз теле дәресеннән соң вафат булган. Тикшерү комитеты һәм прокуратура тикшерү эшләре башлаган. Бу турыда РИА Новости агентлыгы хәбәр итте.
Башлангыч версия буенча, 15 яшьлек үсмер бернигә дә зарланмаган. Ләкин инглиз теле дәресе вакытында аның хәле киткән. Бала аңын югалткан. Тиз арада ашыгыч ярдәм чакырганнар. Хастаханәгә алып барганда, реанимобиль машинасында бу бала вафат булган.
«балигъ булмаган бала үлеме буенча тикшерү эшләре бара. Аннан соң процессуаль карар кабул ителәчәк», дип сөйләгән Россия Тикшерү комитетының төбәк буенча Тикшерү идарәсе җитәкчесенең ярдәмчесе Татьяна Махницкая.
Пенза өлкәсе буенча бала хокуклары буенча вәкил Елена Столярова фаҗига турында сөйләгән. «Фаҗига көтелмәгәндә булган. Малай дәрестә утырып тора. Кинәт кенә хәле китә, аңын югалта. Бернинди йөкләмә дә, физкультура дәресе дә булмый. Директор, фельдшер килеп җитә. Баланың анасы да бу мәктәптә эшли, аны да чакыралар. Ашыгыч ярдәм дә килә. Тик баланы коткарып кала алмыйлар», — дигән ул.