Авылларда нинди яңа льготалар булачак?

Авылда яшәүчеләргә льготалы кредитлар бирә башлаячаклар.
2020 елның 1 гыйнварыннан авылда яшәүчеләргә йортларын төзекләндерү өчен льготалы кредит биреләчәк. Гражданнар өчен 5 проценттан артмасын өчен хөкүмәт процент ставкаларына субсидия бирәчәк, дип яза "АиФ" басмасы. Шушы көннәрдә премьер-министр Дмитрий Медведев хөкүмәтнең әлеге карарына кул куйды. Авылдагы йортны төзекләндерү, скважина бораулау, өйгә үзәк яки автоном электр, су һәм газ кертү, канализация һәм җылылык үткәрү өчен льготалы кредитлар алып булачак. Күпчелек төбәкләр өчен кредитның күләме 250 мең дип чикләнгән. Ленинград өлкәсендә һәм Ерак Көнчыгыш төбәкләрендә яшәүчеләр 300 меңгә кадәр кредит алачак. Карарда күрсәтелгәнчә, эшләр подрядчы оешма белән төзелгән килешү буенча башкарылса гына кредит биреләчәк. Ягъни, кредит алып, йортны үзлектән ремонтлап булмаячак.