Бәйрәмнән соң коела башлаган Яңа ел чыршыларын кая куярга?
Өйгә алып кайтып куелган бәйрәм чыршысын тапшыру өчен берничә урын билгеләнде.
10 гыйнварда Казанда Яңа ел чыршыларын тапшыру өчен урыннар ачыла. 31 гыйнварга кадәр шәһәр халкы бирегә чыршы, пихта, нарат кебек ылыслы агачларны алып килеп калдыра ала. Бу турыда Казан мэриясе хәбәр итте.
Агачларны фермер хуҗалыкларына тапшыралар һәм хайваннар, кошлар өчен өчен аслык итеп кулланачаклар.
Чыршы тапшыру пункты тәүлек әйләнәсендә Гадел Кутуй урамындагы 160 йорт янында эшли. Биредә «Идел буе Экология компаниясе» урнашкан.
Агачларны Җиңү проспектындагы 141 йорт каршында, ягъни «Мега» сәүдә үзәге каршындагы бульвар янындагы контейнерга салып калдырып була.
Чыршыдан уенчыкларын алып куярга онытмагыз.
Былтыр шулай итеп 4 мең тонна чамасы ылыслы агачлар җыелган, аларны кәҗәләргә ашатырга тапшырганнар.