Табиблар сөтне даими куллану сөякләрне ныгытмавын ачыклаган. Шулай ук әлеге ризык кандагы холестеринны арттыра, кан тамыры стенкаларына начар йогынты ясый һәм гипертония китереп чыгарырга мөмкин. Бу хакта "Вечерняя Москва" газетасына сылтама белән "Известия" басмасы хәбәр итә.
Белгечләр сөтнең балалар өчен генә файдалы икәнен әйтә. Ә 20 яшьтән соң әлеге продуктны кулланганда сак булырга кирәк. Шулай да диетолог Георгий Лебеденко сөт продуктларыннан бөтенләй баш тарту кирәк түгел дигән фикердә.
"Саклану вакыты аз булган сөт продуктлары, мәсәлән йогурт, эремчек, сывороткалар кулланырга була. Махсус эшкәртү узган әлеге ризыкларда лактоза бик аз һәм ул зыянлы түгел", - дип сөйләде белгеч.
Ул гади сөтне кокос яки миндаль сөтенә алмаштырырга мөмкин икәнен белдерде. Гастроэнтеролог, Диетология үзәгенең бүлек мөдире Светлана Исакова сыер сөте урынына кәҗә сөтен кулланырга була дигән фикердә.
"Кеше организмы кәҗә сөтен шактый җиңелрәк үзләштерә. Чөнки аның составында А-2 катерогиясендәге бета-казоморфин бар", - диде ул.