2020 елда Россиядә ЖКХ бәяләре күпмегә артачак?

2020 елның 1 июленнән Россиядә коммуналь хезмәтләргә бәя уртача 4 процентка артачак. Алга таба тарифлар индексациясе елга бер тапкыр булачак. Бу хакта Монополиягә каршы федераль хезмәткә (ФАС) сылтама белән «Известия» яза.

Төбәкләрдә тарифлар ел саен инфляция аркасында үсә. Шул сәбәпле Министрлар Кабинеты тариф чиген билгели һәм төбәкләр аны арттыра алмый. 2020 елда ул якынча 4 процент булачак.

2019 елда ЖКХ бәясенә ике тапкыр индексация ясалды. Чөнки НДСның 2 процентка артуы исәпкә алынды, алга таба бу кулланылмаячак.

Россиядәге һәр субъектның үз индексы булачак. Иң югары планка Чечняда билгеләнгән — 6,5 процент. Иң түбән индекс Ненец автоном округында — 2,4 процент. Мәскәүдә — 5, Санкт-Петербургта — 3,8 процент.

«ЖКХ Контроль» илкүләм үзәге директоры Светлана Разворотнева сүзләренчә, индекслар аермасы төбәкләрнең ихтыяҗларына бәйле, мәсәлән коммуналь инфраструктура ремонтына.

Әмма экспертлар фикеренчә, тарифларны арттыру хисабына һәрвакытта та мондый мәсьәләләрне хәл итеп булмый. Коммуналь хезмәтләргә бәя арттыруның никадәр кирәк булуын билгеләүне төбәкләргә тапшыру иң яхшы ысул дип саный белгечләр.