Ришат Төхвәтуллиның тавыш операторы табылган

Ришат Төхвәтуллин Чишмәдәге концерты башланырга ике сәгать кала тавыш операторының югалуы турында хәбәр иткән иде. Концерт өзелмәсен өчен тавыш операторы урынында башка кеше эшләп торган.

Ришат Төхвәтуллин бу хакта полициягә дә хәбәр иткән булган. Җырчы белән бер ай элек хезмәттәшлек итә башлаган 32 яшьлек Артур Гобузов белән берәр күңелсез хәл булмаган микән дип аның тамашачылары да борчуга калган.

Бар да чагыштырмача яхшы дип әйтергә була - Гобузов ике көннән соң табылган. Ул элемтәгә үзе чыккан. Гобузов Петербургка барып җиткән булган. "Минем белән сөйләшмәде, биюче егет белән сөйләшкән, киемнәрне җибәрегез дигән. Без шуны ачыкладык - мондый хәл аның белән беренче тапкыр гына булмаган. Укыган егетләре яза, имтихан вакытында авыр хәлгә калдырды диләр. Безнең аңлавыбызча, ул пультның настройкаларын юкка чыгарган да, нишләргә белмичә котырган да кайтып киткән. Иң мөһиме: исән-сау, акча алган вакыт иде, берәрсе кыйнаган микән дип уйлаган идек. Борчыган өчен гафу итегез, шушы көннәрдә безнең белән булган өчен барыгызга да рәхмәт!" - ди җырчы.