Азат Абитов янгын сүндергән
«Көн герое!» дип мактаганнар инстаграмчылар популяр җырчыны.
Ваһапов фестивале лауреаты Азат Абитов үзенең Инстаграм челтәренә кызыклы гына видео урнаштырган. Җырчы Оренбург тракты урамында урнашкан үзәк ЮХИДИ бинасы кырыенда дөрләп янып утырган чүп савытын сүндергән. Видео астына: «Кем алай эшли инде… Үзең сүндереп калдырсаң да була бит, иптәш незнакомец! Пожар ясыйсың бит. Үзәк ГИБДД кырыенда бит әле ул», — дип язган ул.
Видеоны Азатка «Әйдә, тизрәк бул инде, матурым» дип, көч биреп торучы хатыны Гөлсирин төшергән.
«Күр инде моны. Кешеләр тәмәке тартканнар да, атканнар. Янып тора, — ди Гөлсирин. — Җәмәгать, алай тартып, ташламагыз!», — дип тә өсти ул, бик катгый тавыш белән.
Инстаграм дуслары җырчыларны шунда ук хуплаган.
«Молодцы, Азат белән Гөлсирин! Видеога кызык булсынга төшермиләр алар, тәртипсезләрне әзрәк тәртипкә өйрәтергә телиләр»;
«Көн герое!»;
«Хөрмәтем чиксез!;
«Сез афарин, үтеп китмичә, утны сүндердегез»;
«Молодцы, матурларым! Рәхмәт сезгә, гади, изге күңелле булганыгыз өчен. Бар инде кайбер кешеләр тәртипсез, үзе өчен генә яши торганнар.Тәмәкесен сүндереп ташласа ярамас микәнни? Әллә үзебез шундый, әллә дөнья шулай. Белмәссең!», — дип мактау сүзләре яудырганнар алар.
Шулай ук килеп туган хәлгә ачыклык кертүчеләр дә табылган. «Ул урна ГАИ янында еш яна. ГАИ хезмәткәрләре үзләре чыгып тарталар»;
«Шуна күрә Рифкат Нургалиевич тыйган иде ГАИ хезмәткәрләренә аның янында тартуны. Бу гражданскийларның эше», — дип язганнар алар.
«Янгын чыгарып, ЮХИДИне утка очырсалар, белерләр әле. Җавапка бик тиз тарттырырлар», диеп, акыл сатучылары да табылган җырчыларның инстадашлары арасында-.
«Шампур куярга иде яки тавык», — дип мәзәккә борып җибәргән тагын берсе.
Шулай ук виртуаль дуслары арасында Гөлсиринне, Азатка булышмыйча, фәкать кычкырып һәм видеога төшереп торганын гаепләүчеләр дә табылган.
«Кычкырып торганчы, үзең дә булыш»;
«Кем шулай видеога төшереп тора инде, син дә сүндерергә булыш!»;
«Янган чыкса да, ведиога төшереп торалар, ярдәм итү юк», — дип язганнар алар.
Бәхәсләргә ноктаны Гөлназ исемле хатын-кыз куйган.
«Җансызлар! Минем бабай әйтмешли… мәхәббәтсезләр», дигән ул, урамдагы чүп савытында янгын чыгарып калдыручыларны ачуланып.