«Башына типкән, аягыннан тотып идәнгә бәргән» — кызын кыйнаган ананы төрмәгә яптылар

Казанда яшәүче Алена Епанешникованы яшь ярымлык кызын кыйнаган өчен ирегеннән мәхрүм иттеләр. Казанның Совет районы суды шаккаткыч хәлгә шундый нокта куйды.

Узган елның декабрь башында социаль челтәрләрдә чыккан видео күпләрне тетрәндерде. Видеоязмада ана үз баласын мәсхәрәли. Башта хатын-кыз сабыйны бөтен көченә этеп җибәрә, бала шәрә килеш салкын идәнгә барып төшә. Аннары анасы баласын типкәли башлый, һәр тибүдән сабый ераккарак оча. Хатын-кызны баланың авыртудан һәм куркудан акырып елавы да туктамый. Бу хәлләрне ул үзе видеога төшергән.

«Әтиең сине тәҗрибәләр үткәрә торган куян дип уйлыймы? Әниеңне типкәләгән шикелле сиңа да тибәргә ярыймы? Синең белән берни дә булмый. Ә ул хәзер бүтән хатыннар янына барачак», — ди кызның анасы видеода. Хатын-кызның тавышыннан аның исерек булуы аңлашыла.

Епанешникова шул рәвешле иреннән үч алырга теләгән. Сабыйны мәсхәрәләгән вакытта яздырган видеосын ул иренә җибәргән. Ә ир-ат язманы ялгыш үзенең анасына җибәргән. Килененең үз-үзен тотышынан шок хәлендә калган кайнана шунда ук полициягә мөрәҗәгать итә. Баланы анадан аералар, кыз берничә айга хастаханәгә озатыла.

Хатын-кызны тоткарлыйлар һәм тикшерү изоляторына җибәрәләр. Гаепләнүчеләр эскәмиясенә ул февраль башында утырды. Аңа карата «Газаплау» һәм «Балигъ булмаганнарны тәрбияләү буенча вазифаларны үтәмәү» маддәләре буенча гаеп белдерелде.

Судта гаепләү ягы аны биш ел ярымга рәшәткә артына утыртуны сорады.

Әлеге җинаять эше судта ябык ишекләр артында каралды. Журналистларны залга хөкем карарын игълан иткән вакытка гына керттеләр.

«Син — тәҗрибәгә алынган куян»

Видео кеше арасында таралгач, гаиләне учетка бастырганнар. Күршеләренең сүзләренә караганда, ир-белән хатын еш кына талашып яшәгән, хәмер кулланганнар. Кайвакыт полиция хезмәткәрләрен чакыртырга туры килгән вакытлар да булгалаган.

«Алар, гомумән, еш ызгыша иде. Бер кушылалар, бер аерылалар. Кайвакыт бөтенләй алар өйдә булмаган шикелле. Кайчагында ул ирен өйдән куып чыгара да кертми. Миңа калса, бу юлы да шундый хәл булган. Бәлки, ул әнисе янына киткәндер, ә баласын хатыны алып калгандыр», — дип сөйләде гаиләнең күршесе.

Узган елның августында Епанешникованың ире подъездда сугышкан. Күршеләренең сүзләренә караганда, ир исерек булган һәм нәрсә булганын үзе дә аңлатып бирә алмаган. Күршеләре аның Епанешникова янына килгән кунакка ташлануын фаразлый. Ир-атлар арасындагы чыккан конфликт сугышка әйләнә һәм фатир хуҗабикәсе икесен дә куып чыгара.

26 ноябрь көнне гаиләдә янә җәнҗал чыга. Бу турыда киленен гаепләп полициягә гариза язган каенана Лола Хәмзаева сөйләде. Аның сүзләренчә, Епанешникова ул көнне иренең телефонында чит кызлар белән язышулар тапкан. Җәнҗал чыккан, ир хатынын кыйнап чыгып киткән. Ирен кайтару өчен Епанешникова кызын ничек кыйнавын видеога төшереп җибәргән. Әмма ирдән бернинди дә җавап килмәгән.

«Аның йөзе, башы кара көйгән иде. Улым аны кыйнаган һәм Чистайга балык тотарга киткән. Һәрхәлдә, ул миңа шулай диде. Ничек шулай эшләргә була? Кеше кыйнарга һәм тынычлап балык тотарга китәргә, бигрәк тә шундый видео күргәннән соң», — дип сөйләде Лола Хәмзаева.

Бу хәлгә карамастан, кайнана килененә үч тотмый. Хәтта киресенчә, судтан аны шартлы рәвештә генә ирегеннән мәхрүм итүне сорады.

«Миңа бу хәлдә анасы да, баласы да кызганыч. Ул кызын ярата, мондый хәлнең булганы юк иде. Бу беренче тапкыр булды. Гаиләләрендә җәнҗаллар башлангач, мин аларга аерылышырга куштым. Минем бердәнбер теләгем — оныгымны яклыйсым килә. Бу хәлләрдән аны кем яклар?» — диде кызның әбисе.

Хәзерге вакытта кызның әтисе ата-ана хокукларында чикләнгән, ә ана хокукларыннан мәхрүм ителгән.

Кызны аягыннан тотып идәнгә бәргән

Иректән шартлы рәвештә мәхрүм итү турында сүз алып барылмавы хөкемдарның беренче сүзләреннән үк аңлашылды. Сабыйның тәненә һәм башына күп санлы сугулар, этеп җибәрү, балага әйтелгән сүгенү сүзләре — кызның ничек кыйналуы турында ишеткәннән соң залда утыручыларның йөзе үзгәрде. Кызның анасы бөтенләй дә бернинди хис күрсәтмәде.

«Епанешникова кызны балконга чыгарып җибәргән һәм шунда ябып куйган. Аннары ул бала янына кире килә һәм сигез тапкыр сабыйга суга. Шуннан соң ул кызны этеп җибәрә, бала егыла һәм башын идәнгә бәрә. Епанешникова баланың башына, гәүдәсенә һәм аяклары арасына тибә. Аннары ул кызны аягыннан тотып күтәрә һәм идәнгә бәрә», — дип укыды хөкемдар карар игълан иткән вакытта.

Суд карары буенча Епанешникова дүрт елга гомуми режимлы колониягә озатылды. Суд аны «Газаплау» маддәсе буенча гына гаепле дип тапкан. Аның ата-ана вазифаларын үтәмәвендә гаебе исбатланмаган. Судка кызның атасы хатынының баланы тиешле рәвештә тәрбияләве турында сөйләгән. Хөкем ителүченең адвокаты хөкем карарына карата шикаять белдереләчәген әйтте.

«Епанешникова ирегеннән мәхрүм итү урыннарында булганда төзәлүен күрсәтә алмый. Ул үз гаебен аклау өчен кулдан килгәннең барысын да эшләргә җыена. Ул бала белән аралашырга, эшкә урнашырга һәм алиментлар түләргә тели», — диде хөкем ителүченең адвокаты.

Хәзер бала әбисе Лола Хәмзаева тәрбиясендә. Ул кызның үзен яхшы хис итүе, балалар бакчасына йөрүе, сөйләшә башлавы турында сөйләде. Әмма кыз белән һаман да психологлар эшли. 

Алёна НИЗАМОВА тәрҗемәсе