«Шатлыктан елыйм»: Лилия Сәләхетдинованың шартлаган коляскасы урынына яңасы кайткан
Узган елның декабрь урталарында Лилиянең инвалид арбасы аккумуляторын тулыландырыр өчен токка тоташтырган вакытта шартлаган иде.
«Ярдәм» мәчете проектларының кураторы һәм шул исемдәге дәвалау-белем бирү реабилитация үзәге җитәкчесе урынбасары, шагыйрә Лилия Сәлахетдинова-Тимергалиеваның Инстаграм сәхифәсендә сөенечле хәбәр барлыкка килде. Тумыштан ук җитди авыруы аркасында хәрәкәт итә алмаган кыз яңа инвалид коляскалы булган.
Узган елның декабрь урталарында Лилиягә биш ел буе тугъры хезмәт иткән коляскасы шартлаган иде. Бу хакта «Интертат«та хәбәр ителде.
Шагыйрә аны аккумуляторын тулыландырыр өчен токка тоташтырып калдырган булган. Ул чакта шартлауның сәбәбен төрлечә юраганнар иде. Лилия фаразлавынча, Мәскәүдән Казанга кайтканда колясканы самолетка урнаштырган чакта зыян салган булырга мөмкиннәр. Чөнки куркынычсызлык кагыйдәләрен саклау йөзеннән, колясканы сүтәргә туры килгән.
Әлеге күңелсез хәбәрне ишеткәннән соң, Лилиянең виртуаль дуслары теләктәшлек һәм ярдәм йөзеннән акча җыя башлады. Соңрак ул дусларына рәхмәтен белдереде һәм коляска алырга ярдәмнең бер өлешен республикабыз җитәкчелеге күрсәтәчәген әйтте.
«Шатлыктан елыйм. Мин сезгә бик рәхмәтле. Сез чын мәгънәсендә олы йөрәкле кешеләр. Аллаһы Тәгалә сезнең тормыш юлыгыздагы кыенлыкларга да җиңеллек бирсен», дигән иде ул чакта Лилия ап-ак карга «Рәхмәт» дип язып.
Һәм ниһаять, танылган шагыйрә, күп кенә җырлар авторы Лилия Сәләхетдинова Инстаграм челтәрендә үзенең шатлыгы белән уртаклаша. Хәрәкәтләнер өчен уңайлы булган көтелгән коляскасы кайтып җиткән.
«Бүгенге көн бәйрәмгә тиң. Аллаһыма һәм „Ярдәм“ фондына мең рәхмәтле мин. Сезнең кебек изге кешеләр булышлыгы белән мин тагын уңайлы булган хәрәкәтләнү чарасына ия булдым», — дигән ул.
Аерым рәхмәтен ире Ришатка да белдергән. «Түземлегең һәм кайгыртуың өчен рәхмәт, алтыным! Минем белән булган барлык уңайсызлыклар синең көчле кулларга ята бит», дип язган Лилия.
Инстаграм сәхифәсендә яңа коляскалы булуы белән Лилияне чын күңелдән котлыйлар.
«Тимер атың гомерле булсын, тугры хезмәт итсен»;
«Игелекле булсын, үзеңә туздырырга язсын»;
«Яңа машинаңның рәхәтен күреп йөрергә язсын», — дип язганнар инстадуслары.
«Татар-Информ» язып чыкканча, Лилия белән Ришат Тимергалиевлар күптән түгел «Беренче канал»да бара торган «Ирләр/хатын-кызлар» тапшыруына да барып, үзләренең гаилә кору тарихын сөләп кайтканнар иде. Шул вакытта тапшыруны алып баручы Александр Гардон аларның кайда торганлыгы белән кызыксынды. Үз тораклары булмавын, шулай ук бала алып үстерү теләкләре дә булуын белгәч, ул тапшыру аша Татарстан Президенты Рөстәм Миңнехановка мөрәҗәгать итеп, әлеге гаиләне тораклы итү җаен күрүне сорады.
«Хәлләре гадәттән тыш булу сәбәпле, алар өчен искәрмә дә ясарга мөмкин булыр дип өметләнәм. Без сезнең ярдәмгә бик ышанабыз. Рәхмәт!» — диде Гордон.
Әлеге мөрәҗәгатьтән соң, бу мәсьәлә республика җитәкчесе тарафыннан өйрәнеләчәк, дип белдергән иде ТР Президенты матбугат хезмәте җитәкчесе Лилия Галимова.